வெல்ல போவது யார்? யாருக்கு எத்தனை இடங்கள்?: அனல் பறக்கும் உச்சகட்ட பிரசாரம்

தமிழக சட்டசபை தேர்தலுக்கான பிரசாரம் முடிவடைய இன்னும் 2 நாட்களே உள்ளன. இதனால் தமிழக அரசியல் கட்சிகள் அதீத நம்பிக்கையுடன் தீவிர பிரசாரத்தில் ஈடுபட்டுள்ளன. அரசியல் கட்சி தலைவர்களும் பிற கட்சிகளை குற்றம், குறை கூறுவதை குறைத்துக் கொண்டு, தாங்கள் ஆட்சிக்கு வந்தால் என்னவெல்லாம் செய்வோம் எனக் கூறி ஓட்டு சேகரிக்க துவங்கி உள்ளனர்.

யாருக்கு வெற்றி? :

தமிழக சட்டசபை தேர்தலில் வெற்றி பெற்று ஆட்சி அமைக்க போவது யார் என பல்வேறு கருத்து கணிப்புக்கள் வெளியிடப்பட்டு வருகின்றன. நாங்கள் தான் ஆட்சிக்கு வர போகிறோம்... எங்களின் வெற்றி உறுதியாகி விட்டது என கூறும் அரசியல் கட்சிகளும் அதற்காக ஆளுக்கொரு காரணத்தையும் கூறி வருகின்றன. ஆனால் உண்மையில், தமிழக தேர்தல் களம் முதல் முறையாக 6 முனை போட்டி காண்கிறது. இதனால் வாக்காளர்களின் தேர்வு யார் என்பதை துல்லியமாக கணிக்க முடியாமல் அரசியல் தலைவர்கள் முதல் அரசியல் ஆய்வாளர்கள் வரை சற்று குழப்பத்திலேயே உள்ளனர்.